Polyte, éd sin métier, il étoait bocanier. Ch'étoait point un méchant fiu. Si i n'éroait point feumé comme un dragon (ch'est la pipe qu'i feumoait) il éroait tès quasimènt perfoait. Pis o savez tout comme mi éq des perfoaits, n'y én a point gramènt. A pért mi, bièn seur, pis vous...pétète. Es feume Médorine al alloait à l'jornèe. Il avoait't in-ne vaque, éq ch'est mitan vie, quiques lapins, quiques glain-nes. Ch'est Médorine qu'al étnoait chob-borse. Ch'étoait in-ne feume qu'al savoait qu'pour avouér quiques sous dvant li, faut nin mette èd côté. Ch'est pour o éq quant'ésn'homme il i dmandoait des sous pour acater du toubac, a n'alloait point toujours tout seu.

Est vrai qu'il avoait't des détours : leu vaque al échortoait tous lz'ans, leus lapins i quervoait't comme des mouques, leus glain-nes i n'pondoait't point gramènt ; él long d'lénèe il avoait't l'inchifernure pis dind leu guerdin a n'poussoait ni n'dépoussoait ; leus poérions i n'évnoait't point pus gros qu'des portépleumes...

In coup comme o qu'Polyte i findoiait du bos à leu maison, pis qu'Médorine al étoait partie dins chés camps, él lé vlo à court éd toubac, éch paure homme. In feumeux a n'peut mie rester sans toubac. I s'in vo don dins leu forni pis i kerfouille dins chot-traite pour inséyer d'trouvoér él porté-monnoie dé s'feume. Point d'porté-monnoie. I s'in vo don dins leu cambinet, il ouve échleurmoére et pis i trache, i trache dins tous chés tiloérs. Coére érrien. Point d'toubac, point d'homme. El note i lanche don és main sous chés lincheux, sous chés cmises et pis sous chés tchin-neçons, derrière chés capiaux, chés pénèes pis chés mouchoèrs éd poche. I saque les boukes d'eureilles éd Médorine, ses guertiers pis l'live éd messe dé s'belle-mère. I ramin-ne étou in-ne toute pieute boéte dé rièn du tout, freumèe aveuc in-ne alastique. I rbéye d'dins. Y avoait Troais francs, troais franc in toute, a n'est point gramènt, qu'o m'direz. Bé sié, aveuc troais francs, à ch'momènt lo, oz avoait in-ne boéne poégnie d'toubac, plein in-ne boutife éd couéchon, quasimènt.

Vlo no Polyte contènt comme un jon-ne cot qu'il éroait récouè inne plote éd filè. I s'dépéque éd s'in aller acater ch'qu'i faut pour rimplir és boutife et pis pour bourrer s'pipe.

Médorine, elle, échjour lo, al avoait, comme souvènt, l'inchifernure. In rintrant d'chés camps, a s'in vo à leuz eurmoère tcheure un mouchoér éd poche pis al ermerque qu'oz y a kerfouillè... Al y rbéye d'pus près, a s'apercheut qu'i n'y a pus rièn dins chop pieute boéte à sous. Mon Diu Seigneur ! Des pièches qu'il ont té bénites. Chés troais francs éd leu messe éd mériage !!! Ch'est-i pein-ne qué j'vos raminteuche éq quant' o s'mérioait, o donnoait 13 pièches à Monsieur l'tchurè pis qu'li, i vos nin rdonnaoit troais ? Ch'étoiait chès troais piéches lo, qu'a porté bonheur, qu'il étoait't involèes, o bien volèes.

Al court dins ch'guerdin, éq Polyte il est in route à rpitcher des poérions, après avoér feumé in-ne boéne pipe, bièn seur.

"Bé oui, qu'ch'est mi qu'j'ai prins chés troais pièches éd 20 sous" qu'i dit à s'feume. Médorine al i rmonte ses galoches pis après a s'met in route à braire.

"A nos portera malheur !" qu'al dit.

Polyte, li i prétènd qu'à leu portera bonheur.

O l'creurez si o volez, ch'est Polyte qu'il avoait raison.

Echténèe lo, leu vaque al leuz a vélè deux viaux, leux lapins i n'ont point kervé, il ont tcheuillé des oeufs à l'pindrèe. Dpis ch'temps lo, i n'ont pus d'inchifernure, mais il ont des belles feuvettes pis des poérions gros comme des cordes à puits, aveuc gramènt d'blanc.

MORALITE

Si vo feume al a wardè dins sn'eurmoére chés troais piéches éd vo mériage, prindez-z-zés pis allez acater du toubac aveuc. O n'érez pus à rfoaire et pis o récoltrez des biaux poérions.

Quoi qu'o volez dé miu ?

ECH MOUQUERON